ਮੋਹਾਲੀ ਵਿੱਚ ਟੈਕਸੀ ਯੂਨੀਅਨਾਂ ਦਰਮਿਆਨ ਏਕਤਾ ਮਜ਼ਬੂਤ

 Thursday: 27th May 2021 at 6:19 PM 

ਨਵੀਂ ਚੁਣੀ ਟੀਮ ਜਾਰੀ ਰੱਖੇਗੀ ਮੰਗਾਂ ਲਈ ਪ੍ਰਸ਼ਾਸਨ ਨਾਲ ਰਾਬਤਾ 

ਮੋਹਾਲੀ: 27 ਮਈ 2021: (ਗੁਰਜੀਤ ਬਿੱਲਾ//ਮੋਹਾਲੀ ਸਕਰੀਨ):: 

ਸਮੁੱਚੀ ਮਨੁੱਖਤਾ ਨੂੰ ਜਿਹਨਾਂ ਲੋਕਾਂ ਨੇ ਏਕਤਾ ਵਾਲੇ ਧਾਗੇ ਵਿੱਚ ਸੱਚੀਂਮੁਚੀਂ ਪ੍ਰੋ ਰੱਖਿਆ ਹੈ ਉਹਨਾਂ ਵਿੱਚ ਉਹ ਲੋਕ ਵੀ ਸ਼ਾਮਲ ਨੇ ਜਿਹੜੇ ਰਾਤ ਬਰਾਤੇ ਘਰੋਂ ਨਿਕਲ ਤੁਰਦੇ ਨੇ ਲੋਕਾਂ ਦੇ ਭਲੇ ਲਈ ਦੂਰ ਦੁਰਾਡੇ ਦੀਆਂ ਦੂਰੀਆਂ ਤੈਅ ਕਰਨ। ਕਿਸੇ ਨੂੰ ਮੰਜ਼ਿਲ ਤੇ ਪਹੁੰਚਾਉਣਾ ਅਤੇ ਕਿਸੇ ਦਾ ਸਾਮਾਨ ਉਸਦੀ ਦੱਸੀ ਥਾਂ ਤੇ ਪਹੁੰਚਾਉਣਾ। ਮੀਂਹ-ਹਨੇਰੀ ਅਤੇ ਤੂਫ਼ਾਨਾਂ ਵਰਗੀਆਂ ਕੁਦਰਤੀ ਆਫ਼ਤਾਂ ਦੇ ਨਾਲ ਨਾਲ ਚੋਰਾਂ-ਡਾਕੂਆਂ ਅਤੇ ਬਦਮਾਸ਼ਾਂ ਦਾ ਵੀ ਸਾਹਮਣਾ ਕਰਨਾ। ਰਸਤੇ ਵਿਚ ਲੱਗੇ ਨਾਕਿਆਂ ਵਾਲਿਆਂ ਨਾਲ ਵੀ ਦੋ ਚਾਰ ਹੋਣਾ। ਜ਼ਿੰਦਗੀ ਏਨੀ ਸੌਖੀ ਨਹੀਂ ਹੁੰਦੀ ਗੱਡੀਆਂ ਚਲਾਉਣ ਵਾਲਿਆਂ ਦੀ ਜਿੰਨੀ ਕਿ ਨਜ਼ਰ ਆਉਂਦੀ ਹੈ। ਘਰ ਪਰਿਵਾਰ ਤੋਂ ਦੂਰ ਮੋਹ ਮਾਇਆ ਦੇ ਬੰਧਨਾਂ ਤੋਂ ਉੱਪਰ ਉੱਠ ਕੇ ਦੂਰੀਆਂ ਦੇ ਫਾਸਲੇ ਮਿਟਾਉਣ ਵਾਲਿਆਂ ਦਾ ਇਹ ਵਰਗ ਨਿਤ ਦਿਨ ਹਰ ਕਦਮ ਤੇ ਕਿਸੇ ਨਵੀਂ ਮੁਸ਼ਕਲ ਦਾ ਸਾਹਮਣਾ ਕਰਦਾ ਹੈ। ਇਸਦੇ ਬਾਵਜੂਦ ਸਾਡੇ ਭਾਰਤੀ ਸਮਾਜ ਵਿੱਚ ਇਹਨਾਂ ਕਿਰਤੀਆਂ ਨੂੰ ਅਜੇ ਤੱਕ ਉਹ ਕਦਰ ਨਹੀਂ ਮਿਲੀ ਜਿਹੜੀ ਇਹਨਾਂ ਨੂੰ ਵਿਦੇਸ਼ਾਂ ਵਿਚ ਮਿਲ ਚੁੱਕੀ ਹੈ। ਹੁਣ ਇਹ  ਬੜੀ ਹੀ ਤੇਜ਼ੀ ਨਾਲ ਏਕਤਾ ਦੇ ਸੂਤਰ ਵਿੱਚ ਪਿਰੋਏ ਜਾ ਰਹੇ ਹਨ ਤਾਂ ਕਿ ਸੰਘਰਸ਼ਾਂ ਵਿੱਚ ਹੋਰ ਜਾਨ ਪੈ ਜਾ ਸਕੇ। 

ਮੋਹਾਲੀ ਟੈਕਸੀ ਯੂਨੀਅਨ ਅਤੇ ਟੈਕਸੀ ਵੈਲਫੇਅਰ ਸੋਸਾਇਟੀ ਦੀ ਇਕ ਹੰਗਾਮੀ ਮੀਟਿੰਗ ਅੱਜ ਸਹੀਦ ਊਧਮ ਸਿੰਘ ਭਵਨ ਫੇਜ-3 ਮੋਹਾਲੀ ਵਿਖੇ ਹੋਈ। ਮੀਟਿੰਗ ਦੌਰਾਨ ਮੋਹਾਲੀ ਟੈਕਸੀ ਯੂਨੀਅਨ ਅਤੇ ਟੈਕਸੀ ਵੈਲਫੇਅਰ ਸੁਸਾਇਟੀ ਜਿਨ੍ਹਾਂ ਦੇ ਪਹਿਲਾਂ ਅਹੁਦੇਦਾਰ ਵੱਖਰੇ-ਵੱਖਰੇ ਸਨ, ਦਾ ਰਲੇਵਾਂ ਕਰਦਿਆਂ ਦੋਵਾਂ ਦੇ ਸਾਂਝੇ ਅਹੁਦੇਦਾਰ ਚੁਣੇ ਗਏ। ਇਸ ਮੌਕੇ ਜੰਗ ਸਿੰਘ ਨੇ ਕਿਹਾ ਹੈ ਕਿ ਉਹ ਪਹਿਲਾਂ ਵੀ ਟੈਕਸੀ ਯੂਨੀਅਨ ਅਤੇ ਟੈਕਸੀ ਅਪ੍ਰੇਟਰਾਂ ਦੀਆਂ ਮੰਗਾਂ ਨੂੰ  ਸਮੇਂ-ਸਮੇਂ ਤੇ ਪ੍ਰਸਾਸਨ ਅੱਗੇ ਰੱਖਦੇ ਆਏ ਹਨ ਤੇ ਭਵਿੱਖ ਵਿੱਚ ਵੀ ਰੱਖਦੇ ਰਹਿਣਗੇ ਅਤੇ ਜੋ ਵੀ ਪੈਡਿੰਗ ਮਸਲੇ ਹਨ, ਨੂੰ  ਜਲਦ ਸਮੂਹ ਅਹੁਦੇਦਾਰਾਂ ਤੇ ਮੈਂਬਰਾਂ ਦੇ ਸਹਿਯੋਗ ਨਾਲ ਹੱਲ ਕਰਵਾਇਆ ਜਾਵੇਗਾ। ਉਨ੍ਹਾਂ ਨਵੀਂ ਚੁਣੀ ਟੀਮ ਬਾਰੇ ਚਾਨਣਾ ਪਾਉਂਦਿਆਂ ਦੱਸਿਆ ਕਿ ਗੁਰਦੀਪ ਸਿੰਘ ਚੇਅਰਮੈਨ, ਪ੍ਰਧਾਨ ਜੰਗ ਸਿੰਘ, ਸਕੱਤਰ ਸੁਰਿੰਦਰ ਸਿੰਘ, ਮੀਤ ਪ੍ਰਧਾਨ ਮਲਕੀਤ ਸਿੰਘ ਮੀਤਾ, ਸੀਨੀਅਰ ਮੀਤ ਪ੍ਰਧਾਨ ਸਿਮਰਨਜੀਤ ਸਿੰਘ, ਸਹਾਇਕ ਸਕੱਤਰ ਮੋਹਣ ਸਿੰਘ, ਖਜਾਨਚੀ ਕੁਲਦੀਪ ਸਿੰਘ, ਆਡੀਟਰ ਅਵਤਾਰ ਸਿੰਘ, ਪ੍ਰੈਸ ਸਕੱਤਰ ਗੁਰਪ੍ਰੀਤ ਸਿੰਘ ਨੂੰ  ਚੁਣਿਆ ਗਿਆ।  ਮੀਟਿੰਗ ਦੌਰਾਨ ਪਰਮਜੀਤ ਸਿੰਘ ਸਾਬਕਾ ਚੇਅਰਮੈਨ, ਸੁਖਵਿੰਦਰ ਸਿੰਘ, ਹਰਜੀਤ ਸਿੰਘ, ਹਰਵਿੰਦਰ ਪੱਪੀ, ਗੁਰਚੇਤ ਸਿੰਘ, ਤਲਵਿੰਦਰ ਸਿੰਘ, ਸੁਖਜੀਤ ਸਿੰਘ, ਮਸਤਾਨ ਸਿੰਘ, ਅਵਤਾਰ ਸਿੰਘ, ਹਰਬੰਸ ਸਿੰਘ, ਬਚੀ ਅਤੇ ਤੋਚੀ ਆਦਿ ਹਾਜਰ ਸਨ।